ત્રિપાખયો જંગ! ઈરાન સમર્થિત જૂથે સીરિયામાં US સૈન્ય પર કર્યો ડ્રોન હુમલો

• 13 દિવસથી ચાલી રહેલું ઇઝરાયેલ-હમાસ યુદ્ધ યથાવત છે.
  
• ઈરાન સમર્થિત જૂથોએ સીરિયામાં અમેરિકી સૈન્યને બનાવ્યું નિશાન
• US સૈન્ય દળો પર અલગ-અલગ જગ્યા પર ડ્રોન હુમલો કરાયો

ઇઝરાયેલ-હમાસ યુદ્ધમાં ઈઝરાયલને સાથ આપવો અમેરિકા માટે મહામુસીબતરૂપ સાબિત થઇ શકે છે. અમેરિકા સામે ઘણા મુસ્લિમ દેશો આગળ આવ્યા છે અને તેમાંથી ઈરાન મુખ્ય દેશ છે. ઈરાન સમર્થિત જૂથોએ સીરિયામાં અમેરિકી સૈન્ય સ્થળોને નિશાન બનાવવાનું શરૂ કરી દીધું છે. 

સીરિયામાં US સૈન્ય સ્થાપનો પર શ્રેણીબદ્ધ હુમલાઓમાં આત્મઘાતી ડ્રોનનો ઉપયોગ કરીને કતાઇબ હિઝબુલ્લાએ તાજેતરમાં ઇરાક-જોર્ડન સરહદ નજીક અલ-તાન્ફમાં US સૈન્ય મથકને નિશાન બનાવ્યું હતું. આ ઉપરાંત 2 ફજર રોકેટે દેઇર અલ-ઝોરમાં કોનોકો ઓઇલ ફિલ્ડ નજીક US સૈન્ય પર હુમલો કર્યો હતો. ઇરાકમાં US સૈન્ય દળોને બુધવારે બે અલગ-અલગ ડ્રોન હુમલામાં નિશાન બનાવવામાં આવ્યા હતા, જેમાંના એક હુમલામાં કેટલાક સૈનિકોને નાની-મોટી ઇજાઓ પહોંચી હતી, જોકે US સૈન્ય દળોએ સશસ્ત્ર ડ્રોનને અટકાવવામાં સફળ રહ્યા હતા.

પરંતુ ઇઝરાયેલ-હમાસ યુદ્ધ વચ્ચે પ્રાદેશિક તણાવ વધવાને કારણે વોશિંગ્ટન ઈરાન સમર્થિત જૂથોની ગતિવિધિઓ પ્રત્યે સતર્ક રહે છે. બે અમેરિકી અધિકારીઓએ જણાવ્યું હતું કે, બુધવારની વહેલી સવારે પ્રથમ સ્ટ્રાઈકમાં બે અનગાઈડેડ ડ્રોન સામેલ હતા જેમણે અલ-અસદ બેઝને નિશાન બનાવ્યું હતું. ડ્રોનમાંથી એકને અટકાવવામાં આવ્યું હતું પરંતુ તેમ છતાં તે વિસ્ફોટ કરવામાં સફળ રહ્યો હતો, જેના કારણે નાની ઇજાઓ થઈ હતી અને કેટલાક સાધનોને નુકસાન થયું હતું. 

આ પહેલા ઈરાન હોસ્પિટલ હુમલા બાદ ઈરાનના રાષ્ટ્રપતિ ઈબ્રાહિમ રાઈસીએ બુધવારે કહ્યું હતું કે ઈઝરાયેલ ગાઝા અને પેલેસ્ટાઈનમાં યુદ્ધ અપરાધ કરી રહ્યું છે, જેનો ઈસ્લામિક વિશ્વ બદલો લેશે. રાજધાની તેહરાનમાં હજારો લોકોની સામે પેલેસ્ટિનિયનો સાથે એકતા દર્શાવતા રાયસીએ કહ્યું, "ઇઝરાયેલનો અંત હોસ્પિટલ પરના હુમલાથી શરૂ થયો હતો." પેલેસ્ટિનિયન રક્તનું દરેક ટીપું ઇઝરાયેલને તેના વિનાશની નજીક લઈ જશે.