ICC વિમેન્સ T20 વર્લ્ડકપ 2026ના ગ્રુપ Aમાં સાઉથ આફ્રિકા સામે ભારતીય ટીમની 6 વિકેટથી હાર બાદ સેમીફાઈનલમાં પહોંચવાનો તેમનો માર્ગ થોડો મુશ્કેલ બની ગયો છે. હાલમાં ભારતીય મહિલા ટીમ ગ્રુપ A પોઈન્ટ ટેબલમાં 3 મેચ રમ્યા પછી 4 પોઈન્ટ સાથે બીજા નંબરે છે, જેનો નેટ રન રેટ 2.511 છે.
ટીમ ઈન્ડિયા તેમની આગામી બે મેચમાં બાંગ્લાદેશ અને ઓસ્ટ્રેલિયન મહિલા ટીમનો સામનો કરશે. 25 જૂને ભારતીય મહિલા ટીમ માન્ચેસ્ટર સ્ટેડિયમમાં બાંગ્લાદેશ મહિલા ટીમ સામે મેદાનમાં ઉતરશે. તેથી જો ભારત અને બાંગ્લાદેશ મહિલા ટીમો વચ્ચે T20 ઈન્ટરનેશનલ મેચોમાં હેડ-ટુ-હેડ રેકોર્ડ વિશે વાત કરીએ, તો ટીમ ઈન્ડિયાનું પલડું ભારે છે.
ટીમ ઈન્ડિયાએ 23 માંથી 20 મેચ જીતી છે
વિમેન્સ T20 ઈન્ટરનેશનલ મેચમાં ભારત અને બાંગ્લાદેશ વચ્ચે 23 મેચ રમાઈ છે, જેમાં ભારતીય ટીમનો ટુર્નામેન્ટ પર સ્પષ્ટપણે દબદબો છે. ટીમ ઈન્ડિયાએ 20 મેચ જીતી છે અને ફક્ત 3માં જ હારનો સામનો કરવો પડ્યો છે. વિમેન્સ T20 વર્લ્ડકપમાં બંને ટીમો વચ્ચે અત્યાર સુધીમાં 3 મેચ રમાઈ છે, જેમાંથી બધી જ ભારતીય મહિલા ટીમે જીતી છે.
ભારતીય મહિલા ટીમ હવે તેનો 100% જીતનો રેકોર્ડ જાળવી રાખવાનો ટાર્ગેટ રાખશે. આ મેચ ભારત અને બાંગ્લાદેશની મહિલા ટીમો વચ્ચે માન્ચેસ્ટરના મેદાન પર રમાશે. ટીમ ઈન્ડિયાના રેકોર્ડ પર નજર કરીએ તો તેઓએ અત્યાર સુધીમાં 2 T20 મેચ રમી છે, જેમાં 1 જીતી છે અને બીજી હારનો સામનો કરવો પડ્યો છે.
બોલરો પર રહેશે જવાબદારી
સાઉથ આફ્રિકા સામેની તેમની પાછલી મેચમાં ભારતીય મહિલા ટીમનો પરાજય મુખ્યત્વે તેમના બોલરોના ખરાબ પ્રદર્શનને કારણે થયો હતો. પાકિસ્તાન સામે 5 વિકેટ લેનારી દીપ્તિ શર્મા આ મેચમાં 1 પણ વિકેટ લેવામાં નિષ્ફળ રહી. તેથી ભારતીય મહિલા ટીમના બોલરો આ મેચમાં કેવું પ્રદર્શન કરે છે તે જોવા માટે બધાની નજર રહેશે. આ મેચ પછી તેઓ ઓસ્ટ્રેલિયન મહિલા ટીમનો સામનો કરશે, જે એક મુશ્કેલ મેચ હશે.
આ પણ વાંચો: Virat Kohli ક્રિકેટથી દૂર, પરિવાર સાથે ક્વોલિટી ટાઈમ... સ્ટાર ખેલાડી પુત્ર અકાયને પીઠ પર લઈને જતો મળ્યા જોવા
