ગુજરાત હાઈકોર્ટે સરકારી તંત્ર અને વહીવટી બાબુઓની આડોડાઈ તેમજ બેદરકારી સામે લાલઘૂમ થઈને એક ઐતિહાસિક ચુકાદો આપ્યો છે. અદાલતના આદેશોને ગંભીરતાથી ન લેતા અને આદેશનું સમયસર પાલન ન કરતા શિક્ષણ વિભાગના સચિવ પર હાઈકોર્ટે ભારે નારાજગી વ્યક્ત કરી છે. કોર્ટે ન્યાયિક પ્રક્રિયાની અવગણના કરવા બદલ શિક્ષણ સચિવને 1 લાખનો આકરો દંડ ફટકાર્યો છે. કોર્ટે સ્પષ્ટ કર્યું છે કે આ દંડની રકમ સરકારી તિજોરીમાંથી નહીં, પરંતુ સચિવે પોતાની વ્યક્તિગત ખિસ્સામાંથી ભરવી પડશે.
બે શાળાઓની માન્યતા રદ મુદ્દે હતી અરજી
મળતી વિગતો અનુસાર, આ સમગ્ર વિવાદ બે શાળાઓની માન્યતા રદ કરવાના મુદ્દે થયેલી એક અરજી સાથે જોડાયેલો છે. આ કેસની સુનાવણી દરમિયાન હાઈકોર્ટે પૂર્વ નિયત સમયમર્યાદામાં શિક્ષણ વિભાગને ચોક્કસ કાયદાકીય હુકમનું પાલન કરવાનો આદેશ આપ્યો હતો. જો કે, સરકારી બાબુઓની હંમેશાની ઢીલી નીતિના કારણે હાઈકોર્ટના આ હુકમનું પાલન કરવામાં આવ્યું ન હતું. કોર્ટના આદેશની સરેઆમ અવહેલના થતાં હાઈકોર્ટે કડક વલણ અપનાવ્યું હતું.
