અમદાવાદના નારોલ-અસલાલી હાઇવે પર ગમખ્વાર અકસ્માતની ઘટના સામે આવી છે. નારોલ-અસલાલી હાઇવે પર આવેલી જીઈબી ઓફિસ પાસે એક એક્ટિવા પર ત્રણ વ્યક્તિઓ સવાર થઈને જઈ રહ્યા હતા, ત્યારે આ અકસ્માત સર્જાયો હતો. પ્રાથમિક વિગતો મુજબ, રોડની બાજુમાં પાર્ક કરેલી એક ડાક પાર્સલ ગાડી પાછળ પૂરપાટ ઝડપે આવતું એક્ટિવા ધડાકાભેર અથડાયું હતું.
એક વ્યક્તિનું ઘટનાસ્થળે જ કમકમાટીભર્યું મોત
આ અકસ્માત એટલો ભયાનક હતો કે એક્ટિવા સવાર ત્રણેય વ્યક્તિઓ ફંગોળાઈ ગયા હતા. જેમાં એક વ્યક્તિનું ઘટનાસ્થળે જ કમકમાટીભર્યું મોત નીપજ્યું હતું, જ્યારે અન્ય બે વ્યક્તિઓને ગંભીર ઈજાઓ પહોંચી હતી. સ્થાનિક લોકો અને રાહદારીઓની મદદથી તાત્કાલિક 108 એમ્બ્યુલન્સને જાણ કરવામાં આવી હતી. એમ્બ્યુલન્સ મારફતે ઈજાગ્રસ્તોને તાત્કાલિક સારવાર માટે નજીકની હોસ્પિટલ ખસેડવામાં આવ્યા છે, જ્યાં તેમની હાલત નાજુક હોવાનું જાણવા મળી રહ્યું છે.
