બોટાદમાં ત્રણ પોલીસ કર્મીઓ સામે કોર્ટની કાર્યવાહી સામે આવી છે. વર્ષ 2022ના જૂના કેસમાં મોટો વળાંક આવ્યો છે. કોર્ટે ત્રણ પોલીસ કોન્સ્ટેબલોને હાજર થવા હુકમ કર્યો છે. આ ત્રણ પોલીસ કર્મચારીઓએ ફરિયાદીના ઘરે જઈને રાત્રિના સમયે માર મારીને જબરદસ્તીથી ગાડીમાં બેસાડીને પોલીસ સ્ટેશન લાવીને પણ માર માર્યો હોવાનો આક્ષેપ કરાયો હતો.
સાક્ષીઓના નિવેદનને આધારે કોર્ટે કાર્યવાહી કરી
ફરિયાદીની મેડિકલ તપાસમાં તેમના શરીર પર ચકામા અને ઈજાઓ સહિત સાક્ષીઓના નિવેદનને આધારે કોર્ટે કાર્યવાહી કરી છે. ફરિયાદીએ કોર્ટમાં કહ્યું હતું કે, પોલીસ કોન્સ્ટેબલ જયપાલસિંહ, કૌશિક જાની અને રાહિલ સીદાતર રાતના સમયે તેમના ઘરે આવ્યા હતાં. તેમણે આવીને મારપીટ શરૂ કરી હતી. ત્યાર બાદ તેઓ ગાડીમાં બેસાડીને પોલીસ સ્ટેશન લઈ ગયા હતાં.
