સુરતમાં રમતગમતનું મેદાન રણમેદાનમાં ફેરવાઈ ગયું હોય તેવી ઘટના સામે આવી છે. મોટા વરાછા વિસ્તારમાં આવેલા સુમન આવાસમાં રાત્રે ક્રિકેટ રમવા બાબતે થયેલા ઝઘડામાં ગંભીર મારામારી થઈ હતી. આ મામલે ઉત્રાણ પોલીસે ત્વરિત કાર્યવાહી કરી મહિલા સહિત ત્રણ આરોપીઓની ધરપકડ કરી છે અને સોસાયટીમાં તેમનો ખોફ ઓછો કરવા માટે ઘટનાસ્થળે રિ-કન્સ્ટ્રક્શન પણ હાથ ધર્યું હતું.
સામાન્ય બાબતે હિંસક હુમલો
ઘટનાની વિગત મુજબ, રાત્રે 10 વાગ્યાના સુમારે ક્રિકેટ રમવા જેવી સામાન્ય બાબતે બોલાચાલી થઈ હતી. જોકે, વિવાદ એટલો વકર્યો કે આરોપીઓએ ઉશ્કેરાઈને લાકડાના બેટ અને ફટકા વડે ફરિયાદી પર હિંસક હુમલો કરી દીધો હતો. આ હુમલામાં ફરિયાદીને શરીરે ગંભીર ઈજાઓ પહોંચી હતી. સોસાયટીમાં પોતાનો ડર અને વર્ચસ્વ જમાવવાના ઈરાદે આ હુમલો કરવામાં આવ્યો હોવાનું પોલીસ તપાસમાં બહાર આવ્યું છે.
