ગુજરાત પોલીસના બે બાહોશ અધિકારીઓની વિશિષ્ટ સેવા બદલ રાષ્ટ્રપતિ મેડલ માટે પસંદગી કરવામાં આવી છે, જે સમગ્ર રાજ્ય માટે ગૌરવની ક્ષણ છે. આ સન્માનિત થનારા અધિકારીઓમાં અમદાવાદ ઇન્ટેલિજન્સ બ્યુરો (IB) ના એસ.પી. શૈલેષસિંહ રઘુવંશીનું નામ અગ્રેસર છે. શૈલેષસિંહ રઘુવંશી વર્ષ 2026 માં પોતાની લાંબી અને નિષ્ઠાવાન કારકિર્દી બાદ નિવૃત્ત થવાના છે, ત્યારે નિવૃત્તિ પૂર્વે મળેલું આ સર્વોચ્ચ સન્માન તેમની ફરજ પ્રત્યેની સમર્પણ ભાવનાને પ્રમાણિત કરે છે.
ખાખીનું ગૌરવ
એસ.પી. શૈલેષસિંહ રઘુવંશીએ રાજ્યના અનેક ચકચારી કેસોના મૂળ સુધી પહોંચવામાં મહત્વની ભૂમિકા ભજવી છે. તેમણે કુખ્યાત ગેંગસ્ટર વિશાલ ગોસ્વામી ફાયરિંગ કેસની અત્યંત ઝીણવટભરી તપાસ કરી હતી. આ ઉપરાંત, બહુચર્ચિત દૂધસાગર ડેરી નાણાં ઉચાપત કેસ અને કરોડોના બિટકોઇન કાંડમાં આરોપી શૈલેષ ભટ્ટ વિરુદ્ધની તપાસમાં પણ તેમની કામગીરી પ્રશંસનીય રહી હતી. તેમની આ જટિલ અને બહાદુરીપૂર્વકની તપાસ ક્ષમતાને ધ્યાને રાખીને કેન્દ્ર સરકાર દ્વારા આ પ્રતિષ્ઠિત મેડલ આપવાની જાહેરાત કરવામાં આવી છે.
