બનાસકાંઠા જિલ્લાના ડીસા-પાલનપુર હાઈવે પર સદરપુર ગામ પાસે એક ભયાનક અકસ્માત સર્જાયો હતો. ચાલુ ગાડીએ અચાનક રસ્તામાં કુતરું આવી જતાં તેને બચાવવાના પ્રયાસમાં કાર ચાલકે કાબૂ ગુમાવ્યો હતો, જેના પરિણામે કાર ધડાકાભેર રોડ સાઈડના ઝાડ સાથે અથડાઈ હતી. ટક્કર એટલી જોરદાર હતી કે, અથડાતાની સાથે જ કારમાં ભીષણ આગ ફાટી નીકળી હતી.
ત્રણ મુસાફરોનો આબાદ બચાવ
આ ઘટનામાં સૌથી રાહતના સમાચાર એ છે કે, કારમાં સવાર ત્રણેય વ્યક્તિઓ સમયસૂચકતા વાપરીને આગ વિકરાળ બને તે પહેલા જ સુરક્ષિત રીતે નીચે ઉતરી ગયા હતા. જો મુસાફરો ઉતરવામાં સેકન્ડોનું પણ મોડું થયું હોત તો મોટી જાનહાનિ થઈ શકી હોત. કારમાં આગ લાગતા જ હાઈવે પર અફરાતફરીનો માહોલ સર્જાયો હતો અને લોકોના ટોળેટોળા ઉમટી પડ્યા હતા.
