આજના ડિજિટલ યુગમાં જ્યારે બાળકો મોબાઈલ અને ગેજેટ્સમાં વ્યસ્ત રહે છે.ત્યારે ગુજરાતના ભાવિ ખેલાડીઓને મેદાનમાં ઉતારવા અને તેમની શક્તિઓને વૈજ્ઞાનિક ઢબે વિકસાવવા માટે ગાંધીનગર સ્થિત ચિલ્ડ્રન્સ રિસર્ચ યુનિવર્સિટી દ્વારા એક પ્રશંસનીય પહેલ કરવામાં આવી છે.રમતગમત એ માત્ર શારીરિક કસરત નથી, પરંતુ બાળકના માનસિક વિકાસ અને ચારિત્ર્ય ઘડતરનું માધ્યમ છે.વૈજ્ઞાનિક અભિગમ સાથે રમતગમતના કૌશલ્યો વિકસાવવાથી બાળકો શારીરિક રીતે સક્ષમ અને માનસિક રીતે વધુ મજબૂત બનશે.
આ આયોજનમાં કુલ 11 વિવિધ રમતો રમાશે
યુનિવર્સિટી દ્વારા સુરત ખાતે આગામી તા.9 થી 12 જાન્યુઆરી 2026 દરમિયાન રાજ્ય કક્ષાની અંડર 11 એથ્લેટિક્સ મીટ સીઝન 4.0નું ભવ્ય આયોજન કરવામાં આવ્યું છે.આ સ્પર્ધા માટે રાજ્યભરમાંથી 4500થી વધુ બાળ ખેલાડીઓએ ઉત્સાહભેર નોંધણી કરાવી છે.આ એથ્લેટિક્સ મીટ માત્ર એક સ્પર્ધા નથી પરંતુ રાજ્યની છુપાયેલી પ્રતિભાને યોગ્ય મંચ પૂરું પાડવાનું એક અભિયાન છે.આ આયોજનમાં કુલ 11 વિવિધ રમતો રમાશે, જેમાં વિજેતા બનનાર 1056 બાળકોને કુલ રૂ.22 લાખની પ્રોત્સાહક ઇનામ એનાયત કરવામાં આવશે.
