ગુજરાત સરકારની દરેક ઘરે નળ વાટે શુદ્ધ પાણી પહોંચાડવાની 'નલ સે જલ' યોજના અત્યારે વિવાદોના ઘેરામાં આવી છે. વર્ષ 2024-25 દરમિયાન આ યોજના માટે કરવામાં આવેલી ગ્રાન્ટની ફાળવણી અને તેના વપરાશમાં મોટાપાયે ગેરરીતિ થઈ હોવાના ચોંકાવનારા આંકડા સામે આવ્યા છે. રાજ્યના 20 જેટલા જિલ્લાઓમાં આ યોજના અંતર્ગત થયેલા કામોમાં ભ્રષ્ટાચાર અને નબળી ગુણવત્તાની કુલ 54 ફરિયાદો નોંધાઈ છે.
અમરેલી જિલ્લો ગેરરીતિનું કેન્દ્ર
આ યોજનામાં સૌથી વધુ ચર્ચાસ્પદ સ્થિતિ અમરેલી જિલ્લાની જોવા મળી છે. આંકડાકીય વિગતો મુજબ, અમરેલીમાં ગ્રાન્ટની ફાળવણી ઓછી હોવા છતાં ત્યાં ગેરરીતિની સૌથી વધુ 10 ફરિયાદો નોંધાઈ છે. આશ્ચર્યજનક બાબત એ છે કે અમરેલીમાં ફાળવવામાં આવેલી ગ્રાન્ટ કરતા ખર્ચનો આંકડો વધી ગયો છે, જે નાણાકીય શિસ્ત અને પારદર્શિતા સામે મોટા પ્રશ્નાર્થ ચિન્હ ઉભા કરે છે.
