જૂનાગઢમાં કોંગ્રેસ ભવનમાં ગત મંગળવારે સાંજે એક કાર્યકરે ચાલુ મિટિંગ દરમિયાન ફીનાઈલ ગટગટાવી લીધું હતું, જે મામલે આજે શહેર કોંગ્રેસ પ્રમુખ સામે કાર્યકર દ્વારા જ્ઞાતિ પ્રત્યે અપમાનિત કરીને જાહેરમાં અવગણના કરી હોવાનો આરોપ મુકવામાં આવ્યો છે અને ફરિયાદ કરવામાં આવી છે.
ચાલુ મિટિંગમાં કાર્યકરે ફીનાઈલ ગટગટાવ્યું હતું
જૂનાગઢમાં વોર્ડ નંબર ૧૫ ના પૂર્વ વોર્ડ પ્રમુખ અને કોંગ્રેસના કાર્યકર દીપક દેવજીભાઈ મકવાણાએ આજે બી ડિવીઝન પોલીસ સ્ટેશનમાં શહેર કોંગ્રેસ પ્રમુખ મનોજ ભીખાભાઈ જોશી સામે ફરિયાદ નોધાવી છે, જેમાં એવું જણાવ્યું છે કે, ગત તા.૯ ડિસેમ્બરના રોજ સાંજે ૫.૪૫ કલાકે કોંગ્રેસ ભવનમાં પાર્ટીની મીટીંગ ચાલુ હતું, અને તેઓ ત્યાં ગયા હતા, તે સમયે સત્કાર સમારોહ ચાલી રહ્યો હતો. દીપકભાઈ છેલ્લા ૨૮ વર્ષથી કોંગ્રેસના પાયાના કાર્યકર તરીકે સેવા આપી રહ્યા છે. અને ૧૨ વર્ષથી પૂર્વ ધારાસભ્ય ભીખાભાઈ અને તેમના પુત્ર શહેર પ્રમુખ મનોજ જોશી સાથે પરિચયમાં છે.
