જૂનાગઢ જિલ્લા જેલ ફરીથી વિવાદમાં આવી છે, અહી અગાઉ જેલ સિપાઈ જેલમાં પ્રતિબંધિત સુવિધાઓ આપવા માટે પૈસા માંગતા હોવાના આક્ષેપો થયા બાદ આજે ફરી આવા જ આક્ષેપ સાથે બે કેદીઓને સિપાઈએ માર મારતા બે કેદીઓને ઈજા થતા તે બનેને સારવાર માટે સિવિલ હોસ્પિટલમાં દાખલ કરવામાં આવ્યા છે. જો કે તમામ આક્ષેપોને જેલ અધિક્ષકે પાયા વિહોણા ગણાવ્યા છે.
દીવાલમાં માથું ભટકાવીને ઈજા કરી
જૂનાગઢ જિલ્લા જેલમાં બંદીવાન કેદી તરીકે રહેલા સાહિલ રજાક મજગુલ ઉ.૨૪ અને જાવીદ જમાલ શેખ ઉ.૩૪ બને કેદીઓને માથામાં ઈજા થવાથી સિવિલ હોસ્પિટલના કેદી વોર્ડમાં દાખલ કરવામાં આવ્યા છે, જેમાં સાહિલનું એવું કહેવું છે કે, તેમના ઘરેથી ચાર દિવસ પહેલા કપડા આવ્યા હતા, તે લેવા માટે ગયેલ ત્યારે જેલમાં ફરજ પરના એક સિપાઈએ તેને સીદી આદિવાસી બાદશાહ અંગે જ્ઞાતિ પ્રત્યે અપમાનિત કરીને કાઢી મુક્યો અને દીવાલમાં માથું ભટકાવીને ઈજા કરી હતી.
