સરહદી જિલ્લા કચ્છના ભચાઉ તાલુકાના રામપર ગામે હથિયારધારી ટોળાએ આતંક મચાવતા સમગ્ર પંથકમાં ભયનો માહોલ ફેલાઈ ગયો છે. રામપરના પૂર્વ સરપંચ સાથેના જૂના મનદુઃખને લઈને મોટી સંખ્યામાં આવેલા શખ્સોએ હથિયારો સાથે હુમલો કર્યો હતો. આ હિંસક ઘટનામાં હુમલાખોરોએ 3 થી 4 રાઉન્ડ અંધાધૂંધ ફાયરિંગ કરતા ગામમાં અફરાતફરી મચી ગઈ હતી.
ઘટનાની વિગતો અને હુમલો
પ્રાપ્ત વિગતો અનુસાર, પૂર્વ સરપંચ અને સામેના પક્ષ વચ્ચે લાંબા સમયથી ચાલી આવતા વિવાદે આજે ઉગ્ર સ્વરૂપ ધારણ કર્યું હતું. હથિયારો સાથે આવેલા ટોળાએ માત્ર ફાયરિંગ જ નહીં, પરંતુ પૂર્વ સરપંચના ઘર અને આસપાસના વિસ્તારમાં જોરદાર પથ્થરમારો પણ કર્યો હતો. આ દરમિયાન ત્યાં ઉભેલા વાહનોમાં પણ તોડફોડ કરી મોટું નુકસાન પહોંચાડવામાં આવ્યું છે. આ સમગ્ર ઘટનાના રૂવાડા ઉભા કરી દે તેવા સીસીટીવી ફૂટેજ પણ સામે આવ્યા છે, જેમાં હથિયારધારી લોકો આતંક મચાવતા સ્પષ્ટ દેખાઈ રહ્યા છે.
