મોરબી જિલ્લાના હળવદ શહેરમાં રાણેકપર રોડ ઉપર આવેલ આનંદ બંગલોઝ ખાતે રહેતા અને યાર્ડમાં વેપાર કરતાં વેપારી રોકડા રૂપિયા થેલામાં ભરીને પોતાના ઘર તરફ જઈ રહ્યા હતા ત્યારે તેને રસ્તામાં આંતરીને આંખમાં મરચાની ભૂકી છાંટીને રોકડા રૂપિયા ભરેલ થેલાની લૂંટ ચલાવવામાં આવી હતી. જે ગુનામાં પોલીસે મોરબીના બે શખ્સની ધરપકડ કરી છે અને તેની પાસેથી રોકડ, કાર અને ચોરાઉ બાઇક કબ્જે કર્યું છે.
બે શખ્સોની સામે લૂંટની ફરિયાદ નોંધાવી
હળવદમાં આવેલ રાણેકપર રોડ ઉપર આનંદ બંગલોઝ ખાતે રહેતા વેપારી રજનીકાંતભાઇ ગત તા.2ના રોજ સાંજના 7:30 વાગ્યાના અરસામાં તેઓ યાર્ડ ખાતેથી થેલામાં રોકડા 6.90 લાખ રૂપિયા લઈને પોતાના ઘર તરફ જઈ રહ્યા હતા ત્યારે રાણેકપર રોડ ઉપર અજાણ્યા બે બુકાનીધારી શખ્સો દ્વારા તેને આંતરીને આંખમાં મરચાની ભૂકી છાંટવામાં આવી હતી અને ત્યારબાદ તેના બાઈક ઉપર રાખેલ થેલાની લૂંટ ચલાવવામાં આવી હતી.જે થેલામાં 6.90 લાખ રૂપિયા રોકડા ભરેલ હતા જેથી ભોગ બનેલા વેપારી રજનીકાંત દેથરીયાએ અજાણ્યા બે શખ્સોની સામે લૂંટની ફરિયાદ નોંધાવી હતી.
