વડોદરા શહેરમાં વધતા વાહન ચોરીના કેસ વચ્ચે ક્રાઇમ બ્રાન્ચ ટીમે મહત્વપૂર્ણ સફળતા મેળવી છે. નવાયાર્ડ અને ગોરવા વિસ્તારમાં રાત્રિ સમયે પાર્ક કરેલી એક્ટિવા સ્કૂટરોની ચોરી કરીને તેને ગિરવી મૂકતા રીઢા આરોપી આરિફ સાબીર અલાઉદ્દીન દિવાન (ઉંમર 29 વર્ષ, રહેવાસી સાઇનાથનગર, નર્મદા કેનાલની બાજુ, કરોડીયા રોડ)ને ઝડપ્યો છે. આરોપીની પાસેથી કુલ 6 એક્ટિવા સ્કૂટર જપ્ત કરી વધુ તપાસ શરૂ કરવામાં આવી છે.
શંકાસ્પદ એક્ટિવા સાથે આરિફને પકડ્યો
મળતી માહિતી અનુસાર, ક્રાઇમ બ્રાન્ચ ટીમ શહેરમાં પેટ્રોલિંગ દરમિયાન ફતેગંજ જિમખાના રોડ પરથી નંબર વગરની શંકાસ્પદ એક્ટિવા સાથે આરિફને પકડ્યો હતો. તપાસ દરમિયાન આરોપીએ કબૂલ્યું કે છેલ્લા પાંચ મહિનામાં તેણે નવાયાર્ડ, ગોરવા અને હરણી વિસ્તારમાંથી 6 એક્ટિવા ચોરી કરી હતી. દરેક સ્કૂટરની નંબર પ્લેટ કાઢી નાખી અને તેને ગિરવી રાખી રૂ. 10 હજારથી 32 હજાર સુધીની રકમ મેળવી હતી.
