રાજ્યમાં એક તરફ અસહ્ય ગરમી અને અસહ્ય ભેજને કારણે ભારે ઉકળાટ યથાવત છે.બીજી તરફ હવામાન વિભાગ દ્વારા આગામી 7 દિવસ સુધી વરસાદી માહોલ રહેવાની મહત્વની આગાહી કરવામાં આવી છે.હવામાન વિભાગના જણાવ્યા અનુસાર અમદાવાદ સહિત રાજ્યના વિવિધ વિસ્તારોમાં વરસાદ પડવાની પ્રબળ શક્યતા છે.આ દિવસો દરમિયાન પવનની ગતિમાં પણ સારો એવો વધારો જોવા મળશે.જેને પગલે દરિયા કિનારે ભારે પવન ફૂંકાવાની શક્યતા હોવાથી માછીમારોને સાવચેતીના ભાગરૂપે દરિયો ન ખેડવાની કડક સૂચના આપવામાં આવી છે.
વરસાદી ઝાપટાં પડતાં વાતાવરણમાં આંશિક ઠંડક
હવામાન વિભાગની આગાહી વચ્ચે રાજ્યના વાતાવરણમાં પલટો આવ્યો હતો અને ગઈકાલે સવારે 6 વાગ્યાથી લઈને સાંજે 4 વાગ્યા સુધીમાં કુલ 8 તાલુકાઓમાં મેઘમહેર થઈ હતી. લાંબા સમયના ઉકળાટ બાદ વરસાદી ઝાપટાં પડતાં વાતાવરણમાં આંશિક ઠંડક પ્રસરી હતી.પરંતુ ભેજનું પ્રમાણ વધુ હોવાથી હજુ પણ લોકોને બફારાનો સામનો કરવો પડી રહ્યો છે.આ બદલાયેલા હવામાનને કારણે ખેડૂતો અને સામાન્ય જનતામાં ક્યાંક રાહત તો ક્યાંક ચિંતાનો માહોલ જોવા મળી રહ્યો છે.
