સુરત પ્રાદેશિક વાહનવ્યવહાર કચેરી ખાતે આજથી ટેકનોલોજીના ક્ષેત્રે એક નવું પ્રકરણ શરૂ થયું છે.વાહનચાલકોની લાંબી આતુરતાનો અંત આણીને RTO ખાતે અત્યાધુનિક AI આધારિત ડ્રાઇવિંગ ટેસ્ટ ટ્રેકનો વિધિવત પ્રારંભ કરવામાં આવ્યો છે.સરકારના આ નિર્ણયનો મુખ્ય ઉદ્દેશ્ય ડ્રાઇવિંગ લાયસન્સની પ્રક્રિયામાંથી વચેટિયાઓ પ્રથા દૂર કરવાનો અને વહીવટમાં સંપૂર્ણ પારદર્શિતા લાવવાનો છે.આ નવી વ્યવસ્થાથી ટેસ્ટ આપવા આવતા અરજદારોને મોટી રાહત મળશે.
ટુ-વ્હીલર અને ફોર-વ્હીલર માટે કડક અને ડિજિટલ પ્રક્રિયા
આ નવી વ્યવસ્થા હેઠળ ટુવ્હીલરના અરજદારો માટે બે અલગ અલગ ટ્રેક શરૂ કરવામાં આવ્યા છે.જેથી એકસાથે બે ટેસ્ટ લઈ શકાશે અને લોકોનો સમય બચશે.આ સંપૂર્ણ પ્રક્રિયા AI બેઝ્ડ અને ડિસિઝન ડ્રિવન છે.ટ્રેક પર વાહનચાલકોની સુવિધા માટે ખાસ QR કોડ મૂકવામાં આવ્યા છે.જેને સ્કેન કરતા જ ટેસ્ટ કેવી રીતે આપવો તેનો ગાઇડન્સ વીડિયો જોઈ શકાશે.જો કે નિયમોમાં કડકાઈ પણ વધારવામાં આવી છે.જો કોઈ વાહનચાલક ટ્રેક પર ટ્રાફિક નિયમોનું ઉલ્લંઘન કરશે.તો AI સિસ્ટમ તેને તાત્કાલિક રિજેક્ટ કરી દેશે. ફોર વ્હીલર માટે કુલ 4 પ્રકારે ટેસ્ટ લેવામાં આવશે. આ ટેસ્ટ એટલો સચોટ છે કે કોઈપણ એક સેગમેન્ટમાં અરજદાર ફેલ થશે તો આખો ટેસ્ટ ફેલ ગણવામાં આવશે.
