બિહારના શિવહર જિલ્લાના તરિયાણી છપરા પોલીસ સ્ટેશન વિસ્તારના છપરા સિરહા ટોળામાં સોમવારની સવારે શોર્ટ સર્કિટને કારણે ભીષણ આગ લાગી. આગ લાગ્યા બાદ ઘરમાં રાખેલો ગેસ સિલિન્ડર જોરદાર ધડાકા સાથે ફાટતાં આગે વિકરાળ સ્વરૂપ ધારણ કર્યું. થોડી જ વારમાં આગ આસપાસના અનેક મકાનોમાં ફેલાઈ ગઈ હતી. આ દુર્ઘટનામાં 6 લોકો ગંભીર રીતે દાઝી ગયા છે, જેમાંથી 2 લોકોની હાલત અત્યંત ગંભીર હોવાનું જણાવાયું છે.
ગામના લોકોએ અનેક લોકોને સુરક્ષિત બહાર કાઢ્યા
ઘટનાની માહિતી મળતા જ ગ્રામજનોમાં અફરાતફરીનો માહોલ સર્જાયો. આગની જ્વાળાઓ એટલી ઝડપથી ફેલાઈ કે અનેક લોકોને ઘરમાંથી બહાર નીકળવાનો પણ સમય મળ્યો નહોતો. ગામના લોકોએ પોતાની જાન જોખમમાં મૂકીને અનેક લોકોને સુરક્ષિત બહાર કાઢ્યા અને તરત જ ફાયર બ્રિગેડ તેમજ પોલીસને જાણ કરી હતી.
8 મકાનો સંપૂર્ણપણે બળીને ખાખ
સૂચના મળતા જ ફાયર બ્રિગેડની અનેક ગાડીઓ ઘટનાસ્થળે પહોંચી હતી. ગ્રામજનોના સહયોગથી ભારે જહેમત બાદ આગ પર કાબૂ મેળવવામાં આવ્યો હતો. જોકે ત્યાં સુધીમાં કુલ 8 મકાનો સંપૂર્ણપણે બળીને ખાખ થઈ ગયા હતા. આગમાં અનાજ, કપડાં, ફર્નિચર, વાસણો, રોકડ રકમ સહિત લાખો રૂપિયાનું નુકસાન થયું હોવાનું સામે આવ્યું છે.
ઈજાગ્રસ્તોને સારવાર માટે હોસ્પિટલમાં ખસેડાયા
SDMએ ઘટનાની પુષ્ટિ કરતા જણાવ્યું કે તમામ ઈજાગ્રસ્તોને પ્રાથમિક સારવાર બાદ મુઝફ્ફરપુરની એસકેએમસીએચ હોસ્પિટલમાં સારવાર માટે ખસેડવામાં આવ્યા છે. પ્રાથમિક તપાસમાં શોર્ટ સર્કિટના કારણે આગ લાગી હોવાનું સામે આવ્યું છે. સિલિન્ડરનો વિસ્ફોટ એટલો જોરદાર હતો કે તેના ટુકડાઓ દૂર સુધી ઉડી જતા નજીકમાં ઉભેલા કેટલાક લોકો પણ ઈજાગ્રસ્ત થયા હતા. હાલ પ્રશાસને અસરગ્રસ્ત પરિવારોને તાત્કાલિક રાહત અને વળતર આપવાની પ્રક્રિયા શરૂ કરી છે.
આ પણ વાંચો : Delhi EV Policy : દિલ્હીમાં નવી ઈવી પોલિસી 2026ને મળી મંજૂરી, રોડ ટેક્સ અને રજિસ્ટ્રેશન ફી થશે માફ
