સ્થાનિક સ્વરાજની ચૂંટણીઓ વચ્ચે જૂનાગઢ જિલ્લાના વિસાવદર પંથકમાંથી એક સનસનાટીભર્યો વીડિયો સામે આવ્યો છે. ચૂંટણીમાં મતદારોને રીઝવવા માટે કે અન્ય હેતુસર વહેંચવામાં આવતા રોકડા રૂપિયાના બંડલો અને કવરો ભરતા હોવાનો આ વીડિયો વાયરલ થતા સમગ્ર પંથકમાં ચકચાર મચી ગઈ છે. આ ઘટનાને ‘વિસાવદરનો હવાલાકાંડ’ નામ આપવામાં આવ્યું છે.
શું છે વાયરલ વીડિયોમાં?
વાયરલ થયેલા વીડિયોમાં સ્પષ્ટપણે જોઈ શકાય છે કે, રોકડા રૂપિયાના બંડલો ટેબલ પર પડ્યા છે અને તેને અલગ-અલગ કવરોમાં ભરવામાં આવી રહ્યા છે. સૂત્રોના જણાવ્યા અનુસાર, માંડાવડ અને રતાંગ ગામોમાં પૈસા પહોંચી ગયા છે, જ્યારે કરકડી તેમજ બરડીયા ગામ માટેના થેલા તૈયાર કરવામાં આવી રહ્યા હતા. પક્ષમાં ટિકિટ ફાળવણી મુદ્દે ચાલી રહેલા આંતરિક કલહ વચ્ચે એક નારાજ કાર્યકરે જ આ મોટું સ્ટિંગ ઓપરેશન કરી વીડિયો વાયરલ કર્યો હોવાનું માનવામાં આવી રહ્યું છે.
