ગુજરાતમાં વરસાદે પગપેસારો શરુ કરી દીધો છે અને સાથે જ મહીસાગર જિલ્લામાં પણ મેઘરાજાએ ધમાકેદાર ઇનિંગ શરૂ કરી દીધી છે. જિલ્લામાં મોડી રાત્રિ દરમિયાન સાર્વત્રિક ધોધમાર વરસાદ ખાબક્યો છે, જેને પગલે સમગ્ર પંથકમાં ઠંડક પ્રસરી ગઈ છે. મુખ્ય મથક લુણાવાડા અને બાલાસિનોર સહિત આસપાસના વિસ્તારોમાં રાતભર મુશળધાર વરસાદ વરસ્યો હતો, જેના કારણે રસ્તાઓ પર પાણી ફરી વળ્યા હતા.
ખાનપુર પંથકમાં મેઘરાજાએ જોરદાર બેટિંગ કરી
માત્ર શહેરી વિસ્તારો જ નહીં, પરંતુ ગ્રામ્ય વિસ્તારોમાં પણ મેઘમહેર જોવા મળી છે. ખાનપુર પંથકમાં મેઘરાજાએ જોરદાર બેટિંગ કરી છે, જ્યારે કોઠંબા તાલુકા અને તેની આસપાસના વિસ્તારોમાં પણ એક ઇંચ જેટલો નોંધપાત્ર વરસાદ નોંધાયો છે. લાંબા સમયની રાહ જોયા બાદ આખરે મેઘરાજા મન મૂકીને વરસતા સમગ્ર મહીસાગર જિલ્લાનું વાતાવરણ આહલાદક બની ગયું છે.
