અમેરિકાના રાષ્ટ્રપતિ ડોનાલ્ડ ટ્રમ્પે બિઝનેસમેન બિલ પુલ્ટે (Bill Pulte) ને દેશના કાર્યવાહક નેશનલ ઇન્ટેલિજન્સ ડાયરેક્ટર (DNI) તરીકે નિયુક્ત કરીને મોટો ચોંકાવનારો નિર્ણય લીધો છે. આ પદ અમેરિકાની તમામ 18 ખુફિયા એજન્સીઓની દેખરેખ રાખે છે અને તેને દેશના સૌથી મોટા ખુફિયા અધિકારી માનવામાં આવે છે. વર્તમાન ડીએનઆઈ તુલસી ગબાર્ડનો કાર્યકાળ 30 જૂને પૂરો થઈ રહ્યો છે, જેમના સ્થાને હવે પુલ્ટે આ કમાન સંભાળશે. જોકે, ખુફિયા તંત્ર કે રાષ્ટ્રીય સુરક્ષાનો કોઈ જ અનુભવ ન હોવા છતાં આટલી મહત્વની જવાબદારી સોંપાતા અમેરિકાના રાજકારણમાં મોટો વિવાદ છેડાયો છે.
શા માટે કહેવાય છે 'લિટિલ ટ્રમ્પ'?
બિલ પુલ્ટે ટ્રમ્પના અત્યંત નજીકના અને વફાદાર માનવામાં આવે છે, જેના કારણે લોકો તેમને 'લિટિલ ટ્રમ્પ' પણ કહે છે. તેઓ એક મોટા બિઝનેસ પરિવારમાંથી આવે છે અને તેમના દાદાએ પ્રખ્યાત હાઉસ-બિલ્ડિંગ કંપની 'પુલ્ટેગ્રુપ'ની સ્થાપના કરી હતી. ટ્રમ્પની જેમ જ પુલ્ટે પણ સોશિયલ મીડિયા પર પોતાના વિરોધીઓ પર સીધા પ્રહારો કરવા માટે જાણીતા છે. તેમણે ટ્રમ્પના ચૂંટણી પ્રચારમાં મોટું આર્થિક યોગદાન આપ્યું છે અને તેઓ ફ્લોરિડામાં આવેલા ટ્રમ્પના ખાનગી ક્લબ 'માર-એ-લાગો'ના સભ્ય પણ છે.
હાલ કયા પદ પર છે અને કેવો છે અનુભવ?
હાલમાં પુલ્ટે ફેડરલ હાઉસિંગ ફાઇનાન્સ એજન્સી (FHFA) ના ડાયરેક્ટર તરીકે કાર્યરત છે અને નવી જવાબદારી બાદ પણ તેઓ આ પદ પર ચાલુ રહેશે. ટ્રમ્પે સોશિયલ મીડિયા પર તેમની પ્રશંસા કરતા જણાવ્યું કે પુલ્ટેએ ફેની મે અને ફ્રેડી મેક જેવી સરકારી મોર્ગેજ કંપનીઓનું સફળતાપૂર્વક નેતૃત્વ કર્યું છે. જોકે, એફએચએફએ (FHFA) ના ડાયરેક્ટર બનતા પહેલા તેમની પાસે કોઈ સરકારી અનુભવ નહોતો. તેમના પર આક્ષેપો છે કે તેમણે પોતાના પદનો ઉપયોગ કરીને લિસા કુક અને એડમ શિફ જેવા ટ્રમ્પના રાજકીય વિરોધીઓ વિરુદ્ધ મોર્ગેજ ફ્રોડની ફરિયાદો કરીને તેમને નિશાન બનાવ્યા હતા.
રિપબ્લિકન નેતાઓએ પણ ઉઠાવ્યા સવાલ
ડેમોક્રેટિક સાંસદ માર્ક વોર્નરે આક્ષેપ કર્યો છે કે ટ્રમ્પે કોઈ અનુભવી અધિકારીના બદલે એક એવા વ્યક્તિની પસંદગી કરી છે જે ખુફિયા એજન્સીઓનો ઉપયોગ રાજકીય બદલો લેવા માટે હથિયાર તરીકે કરી શકે છે. માત્ર ડેમોક્રેટ્સ જ નહીં, પરંતુ ખુદ રિપબ્લિકન પાર્ટીના વરિષ્ઠ નેતાઓ જેવા કે સીનેટર જોન થ્યૂન, સુસાન કોલિન્સ, જેમ્સ લેન્કફોર્ડ અને જોન કોર્નિને પણ પુલ્ટે પાસે ખુફિયા મામલાઓનો કોઈ અનુભવ ન હોવા અંગે આશ્ચર્ય અને સવાલો ઉઠાવ્યા છે. કાયમી નિયુક્તિ માટે પુલ્ટેએ અમેરિકી સીનેટની મંજૂરી મેળવવી પડશે, જ્યાં તેમની યોગ્યતાની કડક કસોટી થઈ શકે છે.
આ પણ વાંચો:Japan News:જાપાનમાં પાકિસ્તાની નાગરિકે મંજૂરી વગર મસ્જિદ બનાવતા તોડી પાડવાનો આદેશ
