Iran US War : પ્રભાવિત દેશો હોર્મુઝ સ્ટ્રેટ ખુલ્લી કરાવવા જહાજો મોકલે, દુનિયાભરના દેશોને ડોનાલ્ડ ટ્રમ્પની અપીલ

મધ્યપૂર્વમાં વધતા તણાવ વચ્ચે ડોનાલ્ડ ટ્રમ્પે હોર્મુઝ સ્ટ્રેટને લઈને મહત્વપૂર્ણ નિવેદન આપ્યું છે. ટ્રમ્પે કહ્યું કે હોર્મુઝ સ્ટ્રેટ બંધ થવાને કારણે વિશ્વના અનેક દેશો પર ગંભીર અસર પડી રહી છે. તેથી પ્રભાવિત દેશોએ આ મહત્વપૂર્ણ જળમાર્ગને ફરીથી ખુલ્લો કરાવવા માટે પોતાના જહાજ મોકલવા જોઈએ.

ટ્રમ્પે જણાવ્યું કે જો આ જળમાર્ગ લાંબા સમય સુધી બંધ રહેશે તો વૈશ્વિક વેપાર અને ઊર્જા સપ્લાય પર મોટો પ્રભાવ પડશે. ખાસ કરીને તેલ અને ગેસની અવર-જવર માટે હોર્મુઝ સ્ટ્રેટ અત્યંત મહત્વપૂર્ણ માનવામાં આવે છે.

હોર્મુઝ સ્ટ્રેટમાં હુમલાની શક્યતા

ટ્રમ્પે વધુમાં આરોપ લગાવ્યો કે ઈરાન હોર્મુઝ સ્ટ્રેટ વિસ્તારમાં હુમલો કરી શકે છે. તેમણે દાવો કર્યો કે ઈરાનની સૈન્ય ક્ષમતાને 100 ટકા સુધી નબળી બનાવી દેવામાં આવી છે છતાં પણ તે વિસ્તારમાં તણાવ સર્જવાનો પ્રયાસ કરી શકે છે. ટ્રમ્પે કહ્યું કે ચીન, ફ્રાન્સ, જાપાન અને યુકે જેવા દેશો આ પરિસ્થિતિથી પ્રભાવિત થઈ રહ્યા છે, તેથી તેમને પણ હોર્મુઝ સ્ટ્રેટને સુરક્ષિત અને ખુલ્લી રાખવા માટે પગલાં લેવા જોઈએ.

તેમણે વિશ્વાસ વ્યક્ત કર્યો કે આંતરરાષ્ટ્રીય સહકારથી આ મહત્વપૂર્ણ જળમાર્ગને ઝડપથી ફરીથી સુરક્ષિત બનાવી શકાય છે. ટ્રમ્પે જણાવ્યું કે વૈશ્વિક વેપાર અને ઊર્જા સપ્લાયને સુરક્ષિત રાખવા માટે હોર્મુઝ સ્ટ્રેટનું ખુલ્લું અને સલામત રહેવું અત્યંત જરૂરી છે.

આ પણ વાંચો : Baghdadમાં અમેરિકી દૂતાવાસ પર મિસાઈલ હુમલો, હેલીપેડને ભારે નુકસાન