હેનલી પાસપોર્ટ ઇન્ડેક્સ 2026ની નવીનતમ રેન્કિંગ જાહેર કરવામાં આવી છે, જેમાં દુનિયાભરના દેશોના પાસપોર્ટ કેટલા શક્તિશાળી છે તેની વિગત આપવામાં આવી છે. આ રેન્કિંગ એ દર્શાવે છે કે કોઈ દેશનો નાગરિક વિઝા વિના કે વિઝા-ઓન-અરાઇવલ પર કેટલા દેશોમાં મુસાફરી કરી શકે છે.
વૈશ્વિક સ્તરે સૌથી પ્રામાણિક પાસપોર્ટ રેન્કિંગ
આ રિપોર્ટ ઇન્ટરનેશનલ એર ટ્રાન્સપોર્ટ એસોસિએશન (IATA) ના વિશ્વસનીય ડેટા પર આધારિત હોય છે અને તેને વૈશ્વિક સ્તરે સૌથી પ્રામાણિક પાસપોર્ટ રેન્કિંગ માનવામાં આવે છે. 2026ની યાદીમાં ચોંકાવનારી વાત એ છે કે દુનિયાના સૌથી નબળા પાસપોર્ટ ધરાવતા ટોપના 10 દેશોમાંથી 9 દેશ એશિયાના છે. ખાસ વાત એ છે કે ભારત સાથે સરહદો ધરાવતા 4 દેશો — બાંગ્લાદેશ, નેપાળ, પાકિસ્તાન અને અફઘાનિસ્તાન — આ યાદીમાં સામેલ છે.
આ દેશોનો સમાવેશ
નબળા પાસપોર્ટ ધરાવતા દેશોની યાદીમાં ઉત્તર કોરિયા, પેલેસ્ટિનિયન પ્રદેશો, બાંગ્લાદેશ, નેપાળ, સોમાલિયા, પાકિસ્તાન, યેમેન, ઇરાક, સીરિયા અને અફઘાનિસ્તાનનો સમાવેશ થાય છે. આ દેશોના નાગરિકોને મોટાભાગના દેશોમાં જવા માટે અગાઉથી વિઝા લેવું ફરજિયાત બને છે.
ભારત 80મા ક્રમે
ભારતની વાત કરીએ તો, હેનલી પાસપોર્ટ ઇન્ડેક્સ 2026માં ભારત 80મા ક્રમે છે. ભારતીય પાસપોર્ટ ધારકો હાલમાં 55 દેશોમાં વિઝા-મુક્ત અથવા વિઝા-ઓન-અરાઇવલ સાથે મુસાફરી કરી શકે છે. 2025માં ભારત 85મા ક્રમે હતું, એટલે કે આ વર્ષે પાંચ સ્થાનનો સુધારો નોંધાયો છે. જોકે, ભારત હજી પણ વૈશ્વિક સરેરાશ કરતાં નીચે છે અને વિકસિત દેશોથી ઘણું પાછળ છે.
લોકો માટે અચાનક મુસાફરી કરવી મુશ્કેલ
નબળા પાસપોર્ટના કારણે લોકો માટે અચાનક મુસાફરી કરવી મુશ્કેલ બની જાય છે. વિઝા માટે લાંબી પ્રક્રિયા, એપોઇન્ટમેન્ટ, દસ્તાવેજ ચકાસણી અને ફી જેવી બાબતો મુસાફરીને સમયખોર અને ખર્ચાળ બનાવે છે. ઘણી વખત પ્રવાસ માટે મહિના પહેલાંથી આયોજન કરવું પડે છે. આ રેન્કિંગ માત્ર મુસાફરીની સરળતા નહીં પરંતુ દેશની આંતરરાષ્ટ્રીય સ્થિતિ, કૂટનીતિ અને વૈશ્વિક વિશ્વસનીયતાનું પણ પ્રતિબિંબ ગણાય છે.
આ પણ વાંચો : Ghazipurમાં માતા-પિતા પોતાના જ બાળકોને બાંધવા મજબૂર! સત્ય ચોંકાવી દેશે
